HI PONDIK
Ca leso, reme lonto jojop hi pondik agu reme pikir hang apa hia leso hitu, tiba-tiba lelo liha manga ca cewo de ruang eta pu haju. “uih, manga seng tong daku leso ho’o ga,” tombon agu imus. Pelan-pelan, emi liha cewo de ruang hitu terus na’a liha one ca periuk tana. Poli hitu, kapu liha periuk ho’o bo ba lako-lako one beon agun ciek “nggong… nggong… ceing ngoeng weli?”
Penasaran ata beo so’o bo terus ngo one hi pondik taungs. “Oe Pondik, biasan ta, nggong so’o panden one mai beci to? Co’o tara one mai tana de haun? Toe bikei tong eme ongga ko?” rei data beo. “Ole, toe manga perlu pake onggan nggong ho’o e. Gegoi kat”, wale di pondik sambil gego kin liha periuk tana ho’o. Tu’ung kat, manga runing “ngiiing…ngiiing” one mai periuk ho’o.
Akhirn ga, weli lata beo periuk ho’o. Imus hi Pondik du tiba seng so’o agun teing liha pesan, “gereng ngo aku di po gego le meu nggong ho’o.” Ngo bo hi Pondik ho’o ga, akhirn gego bo le ata welin bo nggong ho’o. Beheng-beheng, tamba keta mesen runing de nggong hoo; “ngiing…ngiiing…” Penasaran bo lawa beo so’o, “apa keta rajan tara runing periuk tana ho’o?” reid. Akhirn, buka lise tadu de periuk ho’o. Tiba-tiba, peangs taung ruang so’o akit ise. Wogol teung wekid ali akit le ruang. Leng cempeng ise, akhirn kawe hi Pondik.
“Hioi!” ciekd du ita hi Pondik reme lonto jojop bolo mai mbaru. Deko lise hi Pondik ho’o terus ba one mbaru gendang kudut teing hukuman. Ai pengaruh wogol taungs bo ata beo so’o, akhirn hukum lise hi Pondik gantung du limen lise one ca pu haju sampe tegi somba agu momang hia one ata beo agu janji toe ulang kole panden. Tapi ga, hitu kin hi pondik hoo, toe mole tobat hia, jebak mole liha ata bana kut ganti hia gantung one pu’u haju.
“Pande apa hau e, Pondik?” rei di Mtembong teman di Pondik hot kole sale mai beo besale.
“Reme olahraga e” wale di Pondik agu gego-gegon gantung eta pu’u haju. “Uih, seber tu’ung kraeng e. pantas kat di’a keta tukam agu mese keta limem,” tae di Mtembong.
Denge hitu, tua kat iden hi Pondik kut rei hi Mtembong kut damang “olahraga” hitu. Eng kat li Mtembong, terus buka liha ikatan lime di Pondik, agu toe kat beheng koen, eta pu’u haju kat hi Mtembong ho’o bo ga, gantung kin.
Ce leso gego-gegoi hi Mtembong eta pu’u haju, beti keta rasan liha ga. Hi Pondik ga, bao morai ga. Untungn ga, manga ca ata beo hot reme lako.
“Oe, Mtembong, pande apa hau e? Cala hi Pondik sebenarn ata hukum nitu?”
“Hukuman?” rei di Mtembong agu bingungn. Poli kat tombo masalan le temann, akhirn sadar hi Mtembong, adong hia bo hi Pondik.
Nice bro, i like to read
ReplyDelete